wegli und stegli entlang em grimselsee

e herrlich interessanti wanderig am grimselsee nah hindere und uf em gliche weg wieder zrugg. dur das cha mer sie so lang oder churz gstalte wie mer wott. da gahts dur tunnel, stägeli uf und ab, a wasserfäll verbi, grad landschaftlich sehr abwechsligsrich und spannend. obwohl's 'nur' am see nah gaht, gahts ufe und abe und es chömed je 800m höhemeter deruf und derab zäme.

grimsel hospiz (1980m) – staumauer – spittellamm – unteraargletscher 2std – spittellamm – staumauer – grimsel hospiz (1980m) 4std

da's nur ein weg git, i di eint oder ander richtig, sind d'variante beschränkt. mer chönti e 2-tagestour zur lauteraarhütte ufe mache, ab seeendi isch de weg jedoch blau markiert, und über sini beschaffeheit chani kei uskunft geh. möglicherwiis mues mer en gletscher quere. s'hüttepersonal chan eim da aber sicher guet uskunft geh.

gnueg ässe und trinke mitneh, da mer unterwegs kei verpflegigsmöglichkeit hät. defür häts umso meh schöni plätzli zum verwiile. echli ziit mitbringe!
nach de wanderig isst mer im hospiz sehr lecker, mit ufmerksamem und fründlichem personal zu moderate priise.

ja cha mer mache, ich finds aber nöd sehr ideal. die pfad sind zum teil sehr schmal und holperig, s'chrüze mit anderne lüt isch zum teil au ohni hund nöd immer ganz eifach.