vom campingplatz, womer pfuset händ, sind's z'fuess 10 minute zum bahnhof wilderswil füre. det stiigemer is bähnli, wo zur schynige platte ufe gaht. e gschlagni stund schaukled eus das zügli de berg deruf. scho unterwegs isch d'usicht bombastisch, obwohl's es paar quellwulche hät. dobe acho, gömmer zersch is beizli füre go zmörgele, simmer doch ufs erschte bähnli.

womer satt sind, gömmer wieder zu de station füre und gönd hangsiitig deruf, richtig oberberghorn/laucheren. es gaht es paar höhemeter deruf, denn verlauft de weg fasch de höhelinie entlang, im boge zum oberberghorn übere. glii treffemer uf de weg, wo vo de daube her chunt und etzt gsehmer s'ersch mal hine ab. de thunersee und de brienzersee lüchtet blau zu eus ufe, herrlich! de weg füehrt ufem grat nah wiiter und denn stömmer am fuess vom oberberghorn. mir überleged churz, öb mer sölled en abstächer ufe mache, doch es isch heiss und de weg no wiit.

also lömmer das horn links ligge und gönd wiiter em grat nah. denn gits en abstieg über e langi gitter-stäge. für eus isch das keis problem, für en hund chas denah eis sii. nebed de stäge dure, isch es würkli sehr steil, aber echli en trittsichere hund isch det mit es paar gümp dune. chlineri chönt mer allefalls uf de arm neh.

wiiter em grat nah gahts, jetzt ufs laucherehorn zue. churz bevor mer in gnuss vo sim schatte chömed, chunt vo rechts une ufe de zweit weg vo de schynige platte her. mit hund wär allewäg de säb pfad de besser, chönt mer so die leitere umgah. im schuttchegel vom laucherehorn gnüssemer de schatte, doch es gaht nöd lang, und mir sind wieder de erbarmigslose sunne usgsetzt. eusi wasserreserve sind scho ganz ordentli aabrucht, mini hoffnig liit im berghuus männdlenen, dass mer det eusi fläsche chönd fülle.

doch zersch wänd no es paar höhemeter under d'füess gno werde. mir quered en hang mit schafbetrieb, wo mer de hund es churzes stuck müest a d'leine neh. jetzt gsehmer s'ersch mal ufs faulhorn übere, wo i de ferni i d'höchi ragt. doch wells scho am elfi soo heiss isch, halted sich eusi begeischterigs-stürm i grenze.. es gaht wieder echli deruf, di erschte schmelzwasserbächli laufed über de weg, doch ussert eme hund würd wohl niemer devo trinke.. es hät au de erschti schlupf, womer bime unwetter chönti schutz sueche.

rechts über eus raged di 'inner sägissa' und nachher di 'usser sägissa' hoch uf, und i ihrem schatte häts zum teil no echli schnee. wos wiit über eus emal polteret, zieh mer d'chöpf ii und mached dass mer furt chömed. eventuell es paar steiböck, doch dass interessiert eus im aagsicht vome steischlag herzlich wenig. ersch bim punkt 'gotthard', wo de weg fascht e 180° grad cheri macht, nehmed mers wieder ruhiger. links under eus glitzered s'sägistal-seeli zu eus ufe.

jetzt chunt zum erschte mal s'berghus männdlenen in sicht, doch bis det ane gits no es paar schneefelder z'quere. äntli hämmers gschafft und sitzed uf terasse use. e pause isch au nötig, vo de hütte us gahts grad en rächte stutz deruf, da mues mer zersch wieder bitz zu chräfte cho. d'wirtin hät schlechte bscheid für eus, au sie hät nur schmelzwasser zur verfüegig. so blibt eus nüt anders übrig, als trinkwasser z'chaufe und umzfülle.

womer wieder bi chräfte sind, nehmemer de steili ufstieg under d'füess. es isch aber nöd so wiit. glii simmer uf de ahöchi, denn gahts ufem felsrugge echli weniger steil wiiter. s'faulhorn drängt sich is bild. glii stömmer am fuess vonem, und d'entscheidig staht a: ufe, oder doch lieber une dure. und abermals isch es d'hitz, wo eusi füess gradus wiiter füehred, underem horn dure. mir erreiched de höchschti punkt, vo jetzt a gahts nur no hine abe.

de wanderweg füehrt no bis zum gassenbode, denn wird de weg breiter. mir gsend vor eus i de tüüfi s'ersch mal de bachalpsee glitzere, drüber raged s'schreck- und s'wetterhorn uf. ufem relativ steile abstieg zum see abe, chömemer nomal a zwei schutzhüttene verbi. schliessli simmer am seeli selber, de liechti chnüüschlotteri verzieht sich augeblicklich, es gaht wieder gradus wiiter. vom see bis zum firscht gahts meh oder weniger de höhekurve hah, und ufeme breite spazierweg. dementsprechend vill spaziergänger chömed eus au vom firscht her entgege.

mir chömed zügig fürschi und 40 minute später simmer bi de station firscht, wo eus es gondelbähnli uf grindelwald abe treit. natürli nöd ohne es erfrischends getränk uf de terasse und eme letschte blick i di gwaltigi bergwelt. in grindelwald une denn, laufemer zersch zu de hauptstrass abe, denn haltemer eus rechts und 10 minute später laufemer direkt an bahnhof ane. det bringt eus d'berner-oberland-bahn wieder zrugg uf wilderswil.