mir fahred uf schwande und parkiered det s'auto bim bahnhof. well mer nochli ziit händ, gömmer no in schwandnerhof. git en feine kafi! nachher gömmer go billet löse, und zwar cha me so es rundreisebillet chaufe, für 19.- mitem halbtax, susch 24.-.

de bus fahrt pünktlich ab, und kurvt ufeme enge strässli richtig kies hindere. det gaht es gondeli uf d'mettmeralp ufe. am nüni simmer dobe und laufed los, no im chüele schatte. nach feuf minute tuet sich d'ussicht uf de garichtisee uf, wo aber chli enttüschend isch, da's de stausee halbe ablah händ. isch nüt schöns...

mer lauft denn uf der linke siite vom see nah, und chunt nach 10 minute zume wegwiiser, wo uf beidne wildmad / elm staht. allerdings isch s'einte en wanderweg und s'ander en bergwanderweg. isch ja klar, für welle dass er eus entscheided, aber nöd, bevor mer de kompass praktisch agwendet händ. und tatsächlich! es funktioniert.. dehei im garte troche güebt und es bewährt sich aso au im praktische... nach dem erfolgserlebnis fallt de zimli steili ufstig scho vill liechter....

bim nächschte abzwiiger (ohni tafle) cha mer s'weniger dütliche wegli rechts de berg uf neh, isch e rechti abchürzig. mer merked das a lüt, wo hinder eus wandered, denn aber uf einisch vor eus in sicht chömed.. d'charte bestätiged eus das. nach de erschte 200 höhemeter zwiigt sich de weg erneut. dasmal häts au e tafle. mir müend rechts em hang nah traversiere, de ander weg gaht zum berglimattsee.

bis jetzt am schatte, chömemer feinisch in sunnehang ine, und gsend nomal uf de garichtisee abe, im hindergrund erhebt sich mächtig de glärnisch. es isch uu schön! chli später machemer e churzi pause, es isch fasch halb elf, und min fuess git mer z'spüüre, dass er doch no nöd so ganz uf de höchi isch. mir nutzed d'pause grad, zum eusi hose chürze und au obedra wirds liechter.

es isch en wunderschöne herbschttag, nöd eis wülchli isch am himmel..... denn nehmemer de rescht vom ufstig, jetzt gseht mer de übergang, wo me i d'wildmad übere gaht. d'ussicht wird immer besser, hauptsächlich de kärpf staht mächtig über eus. mit em feldstecher gsehmer a d'leglerhütte übere. am schluss wirds no cheibe stotzig, aber mitem richtige tramp gaht au das. churz vor de zwölfe simmer denn dobe, und es tuet sich e zimli flachi ebeni vom wildmad uf.

es hät au s'eint oder ander seeli, und für so eis entscheidemer eus, zum raschte. au d'elmer-siite isch wunderherrlich zum aluege. da gseht mer de piz sardona, de piz segnas und tschingelhoren mitem martinsloch. es isch sehr sichtig, i de wiiti gseht mer sogar de säntis dureblinzle.... en blick uf d'charte seit eus, dass s'abelaufe öpe zwei stund gaht. wells aber ersch mittag isch, richtemer eus ii, ziend d'schueh ab und gnüssed es sunnebad. es isch wie ferie, mer händ en huufe z'lache mit kompass, charte und de digitalkamera....

ersch am halbi drü machemer eus uf de wiiterweg, chömed aber nöd sehr wiit. nachere viertelstund zwiigt sich nämli de weg wieder, und wieder cha mer uf zwei arte zum ziil cho. mir entscheided eus für d'chüebodenalp, d'clod gaht denn im chüebodenseeli no schnell go bade.. und au susch nehmemers gmüetlich, ich mues ganz langsam derab, weg mim fuess und sehr bewusst druf stah. mer chönti au rechts abe, de sesselibahn nahlaufe. mer chunt denn bi de munggehütte verbi, lauft aber no es ziitli ufeme chiessträssli.

i de chuenz, bines paar gade, churz nachdem mer s'bächli überquert händ, machemer nomal e pause. es isch viertel vor feufi, s'bähnli hämer grad verpasst, resp. de bus nachher. und usserdem hämmers ja nöd würkli pressant. s'letschte stuck verlauft ufeme super usboute flache wegli. es isch grad en entspannig, nachdem lange, steile abstieg. es isch grad no öpe e viertelstund bis zum bähnli.

unterdesse isch halbi sechsi, und mir schwant übels, woni gseh, dass d'gondeli stönd. und tatsächli, s'letschte isch am zäh ab feufi gfahre.. so es pech! aber es wended sich no alles zum guete. es isch nämli no en seilbahnmensch det, und de seit, mer chöned denn no mitem personal vom reschti abefahre, öpe am sächsi. und well de letscht bus au scho weg isch, frögemer eini, öb sie eus mindschtens bis uf elm chön mitneh. sie chan, isch uu e liebi und fahrt eus bis uf schwande zum auto. was füren tag!!