ich gnüsses uu, und d'rueh isch mega, fasch mystisch. mer merkt, dass es no morge isch, es isch no alles so frisch. de weg schlänglet sich wild dur gegend deruf, und obwohl ich de under teil scho mal gange bin, isch es wieder wie neu und ich mues ufpasse, dassi mi nöd verlauf. es isch gar nödemal so eifach u dem weg z'bliibe, mer mues sich uu uf d'markierige verlah!! und wenn mer es momentli nöd ufpasst, isch mer scho a de abzwiigig verbi, und lauft uf irgendeme chuehtrampelpfad..

nach öpe ¾ stund gahts s'ersch mal wieder chli derab, und churz druf abe chumi zunere abzwiigig miteme wegwiiser, wo scho halbe umgheit. welli aber scho mal da gsi bin, schlan ich de trampelpfad links em hang nah ii, sobald ich sichtkontakt mitem wegwiiser han. es hät zwar gar kei markierige, ersch chli wiiter obe chömeds wieder. mer chan au direkt bim wegwiiser zue, links im 90° winkel de hang nah deruf chräsme, em haag nah, denn chunt mer au wieder uf de richtig pfad. wenn me das aber nöd weiss, isch es blöd, denn lauft mer nämli eifach en umweg vo mindeschtens enere halb stund, wenn nöd meh.

well ich aber ufem richtige weg bin, lauf ich fröhlich wiiter und gnüss di unglaublich rueh. wonich so über e kuppe chum, und so für mich säg, 'so schön', schreck ich mit minere stimm drü reh uf, wo ganz näch a mir verbi renned. ehrfürchtig lauf ich wiiter.. s'gländ wird immer felsiger, und mer gseht immer meh vo dene typische karrefelder, wo d'silbere so einzigartig mached. nach zwei stund macht sich min fuess bemerkbar, und ich mach schnell e viertelstund pause.

unterdesse laufi i de sunne, es isch scho recht warm, und durs doch recht astrengende wandere chumi uu is schwitze.. nach wiitere ¾ stund wirdi langsam unsicher, lut de charte bin ich no überhaupt niened. wie söll ich das au schaffe, ich ha mi glaub völlig überschätzt. denn chumi zume abzwiiger, wo uf d'stei gmalet sind. gradus gängst wiiter zur silberenalp, aber links ufe gängst zu de silberen und twärenen ufe.

mir chunt in sinn, was mer en bergbuur gseit hät, woni s'letscht mal da obe gsi bin, dass mer chan über d'silberen übere laufe. also mach ich de versuech, obwohl de weg uf minere charte nöd so guet verzeichnet isch. chli später findi au use werum. d'markierige sind nur no uf de felse ufgmalet, weg gits fasch e kei meh. nacheme letschte ufstig han ich d'höchi scho fasch und gsehn jetzt über di wiiti hochebeni vo de silbere.

d'rundsicht haut mi um... fasch alles bestaht us dene usgwäschne kalkfelse, und ganz uf de andere siite gseht mer de steihubel mitem chrüz, wo de höchschti punkt markiert. aso machi mi an weg. ab und zue gsits chli es chlättere, aber ich nimms schritt für schritt, denn gahts. am zwölfi bini bim gipfelchrüz und triff det en wanderer, zäme ässemer zmittag.

er seit mer denn, ich chön vo da us direkt zum pragelpass abe steche, und zwar heg mer öpe zwei stund. en rise stei gheit mer vom herze und ich chan die bombastischti ussicht no vill meh gnüsse. mer hät en rundblick, unbezahlbar.. mer gseht de rigi, bis in pilatus hindere, de sihlsee und de zürisee...... am eis verabschidi mi vo mim gspäänli, er gaht det abe, wonich ufe cho bin und umgekehrt.

ich mach no schnell mis gipfelfilmli und mach mi denn an abstieg. immer no gahts über die felse, zum teil muesi au chli d'händ z'hilf neh, zum derab chräsme. für min fuess nöd sehr ideal. aber ich mach langsam und denn gahts. wieder häts all paar meter echli farb ufem fels, mer isch froh drum, wür mer sich doch susch elend verlaufe. nie cha mer de verlauf vom weg zum vorus errate, immer wird mer vo neuem überrascht.. no spannend..